Andrey Levkut, “Farmak” şirkətinin regional marketinq meneceri (Ukrayna)
-Medinex 2025 sərgisində üç Ukrayna şirkəti iştirak edir. Mən təmsil etdiyim “Farmak” şirkəti təxminən 300 adda dərman vasitəsi istehsal edir və hər il bazara 20-yə yaxın yeni preparat çıxarırıq. Sərgidə iştirak bizim üçün öz nailiyyətlərimizi nümayiş etdirmək və onları Azərbaycanlı mütəxəssislərə tanıtmaq üçün əla imkandır.
Burada həmçinin “Biofarma” şirkəti də təmsil olunur. Bu şirkət Azərbaycanda artıq “Albümin” preparatı ilə tanınır. Bu il isə onlar tamamilə yeni bir preparatı bazara çıxarırlar ki, bu da Ukrayna farmasevtikasının dinamik inkişafını və innovativliyini göstərir.
Digər şirkət — portativ rentgen avadanlığı istehsalçısı “Formarmet”dir. Bu kifayət qədər innovativ məhsuldur və əminəm ki, Azərbaycandakı mütəxəssislərin və klinikaların marağına səbəb olacaq. Belə texnologiyaları canlı şəkildə görmək həmişə təsirli olur və biz onları geniş auditoriyaya təqdim etməkdən məmnunuq.
Bizim sərgidə iştiraktakı əsas məqsədimiz “Farmak”ın Azərbaycan bazarında mövcudluğunu genişləndirməkdir. Məqsədimiz preparatlarımızı daha əlçatan etmək və yerli distribyutorlarla əməkdaşlığı gücləndirməkdir. Ümid edirik ki, sərgi bizə yeni tərəfdaşlıqlar qurmaq və birgə layihələr üçün imkanlar yaradacaq.
Bundan əlavə, yaxınlarda Ukraynanın səhiyyə nazirinin iştirakı ilə konfrans keçirildi. Orada dərman vasitələrinin qarşılıqlı tanınması, əməkdaşlığın gücləndirilməsi və farmasevtika sahəsində təcrübə mübadiləsi ilə bağlı məsələlər müzakirə olundu. Bu mövzu bizim üçün xüsusilə önəmlidir, çünki “Farmak” məhsullarının keyfiyyətinin beynəlxalq səviyyədə tanınması ixrac üçün yeni imkanlar açır. Azərbaycanlı tərəfdaşlarla müzakirə etdiyimiz praktik məsələlərdən biri isə qiymət tənzimlənməsidir. Məhsullarımızın üçüncü qiymət kateqoriyasına salınması səbəbindən distribyutorlar hələlik “Farmak” preparatlarını idxal edə bilmirlər, baxmayaraq ki, onlar Avropa bazarında uğurla satılır. Ümid edirik ki, innovativ dərmanlarımız tezliklə geniş istehlakçı kütləsi üçün əlçatan olacaq.
Medinex sərgisi bizə təkcə məhsullarımızı nümayiş etdirmək deyil, həm də canlı ünsiyyət qurmaq, inkişaf perspektivlərini müzakirə etmək və təcrübə mübadiləsi aparmaq üçün gözəl imkan yaratdı. Bu, Ukrayna-Azərbaycan əməkdaşlığının farmasevtika sahəsində gücləndirilməsi üçün vacib addımdır. Əminəm ki, belə tədbirlərdə iştirak məhsulları təqdim etməklə yanaşı, ukraynalı mütəxəssislərin yüksək peşəkarlığını, innovasiyalara və keyfiyyətə sadiqliyini göstərməyə imkan verir. Hesab edirəm ki, burada keçirilən hər görüş yeni ideyaların müzakirəsi, bazarın ehtiyaclarını anlamaq və həm mütəxəssislər, həm də pasiyentlər üçün faydalı həllər təklif etmək imkanı yaradır.
Biz yalnız dərmanları deyil, eyni zamanda müalicə və diaqnostikaya innovativ yanaşmaları nümayiş etdirməkdən qürur duyuruq. Təbii ki, sərgidə iştirak digər iştirakçıların təcrübəsindən ilham almaq, sahə trendlərini öyrənmək və gələcək əməkdaşlıqları müzakirə etmək üçün də gözəl fürsətdir.
AZ
EN
RU
ZH
